Örfréttir

Það er allt gott að frétta af okkur og allt gengur vel. Það hefur ekki verið mikill tími til að blogga þar sem kvöldin hafa farið í vinnu hjá Hjördísi og ég asnaðist til að byrja mála þvottaherbergið. Það er því mikið búið að ganga á og Bríet er orðin vön því að spjalla við strákana í Flugger búðinni og þekkir rekkakerfið í Húsasmiðjunni nokkuð vel, hún fór meira segja inn á lager hjá Sindra stál í dag og endaði svo í Blikksmiðju Reykjavíkur. Það er því mikið að gera hjá okkur þó svo að hún hafi ekki gripið í pensil ennþá. Það er samt bara málað þegar að hún er farin að sofa. Bríet er að fá tvær tennur í neðri gómin, það er aðeins farið að glitta í þær, það verður gaman að sjá hvernig hún breytist við það. Við erum búinn að vera dugleg að heimsækja og það er alltaf eitthvað í gangi hjá okkur. Við erum loksins búinn að fá okkur fínan heimasíma og það tók bara tæplega tvö ár, svo er svona hitt og þetta sem við erum með í vinnslu í ferðum okkar um borgina. Kaffitár hefur enn sem komið er vinninginn í Lattekeppninni sem ég setti á koppinn.

Nágranni minn hló þegar hann sá skeggvöxt minn í dag og spurði hvað væri í gangi, ég sagðist vera í fæðingarorlofi og þyrfti ekki að raka mig, hann hló enn meira. Málið er það að ég bíð í ofvæni eftir að Bríet geti gripið í skeggið og haldið fast í það, það er ekkert hár á höfðinu sem hún getur fiktað í. Hún er vön að grípa aðeins í hárið á mömmu sinni og toga það allt til. Svona er þetta allt saman núna og við bíðum bara eftir því að Hjördís komist í smá frí þannig að við getum farið eitthvað út á land.